OFISI YA TAIFA YA TAKWIMU YAWANOA WAKUFUNZI WA UTAFITI WA WATU WENYE UWEZO WA KUFANYA KAZI

 Mwakilishi wa Mkurugenzi Mkuu wa Ofisi ya Taifa ya Takwimu Bw. Ephraim Kwesigabo akitoa maelezo ya utangulizi katika ufunguzi wa mafunzo ya wiki mbili ya Wakufunzi wa Utafiti wa Watu Wenye Uwezo wa Kufanya Kazi wa mwaka 2014 yaliyofanyika leo katika ukumbi wa Edema uliopo Morogoro mjini.

 Naibu Waziri wa Kazi na Ajira Mhe. Dkt. Milton Mahanga (MB) akihutubia wakati wa ufunguzi wa mafunzo ya wiki mbili ya Wakufunzi wa Utafiti wa Watu Wenye Uwezo wa Kufanya Kazi wa mwaka 2014 yaliyofanyika leo katika ukumbi wa Edema uliopo Morogoro mjini.

 Naibu Waziri wa Kazi na Ajira Mhe. Dkt. Milton Mahanga (MB) akihutubia wakati wa ufunguzi wa mafunzo ya wiki mbili ya Wakufunzi wa Utafiti wa Watu Wenye Uwezo wa Kufanya Kazi wa mwaka 2014 yaliyofanyika leo katika ukumbi wa Edema uliopo Morogoro mjini.

Mgeni rasmi Naibu Waziri wa Kazi na Ajira Mhe. Dkt. Milton Mahanga   (katikati)  akiwa katika picha ya pamoja baada ya kufungua rasmi Mafunzo ya wiki mbili ya Wakufunzi wa Utafiti wa Watu Wenye Uwezo wa Kufanya Kazi wa mwaka 2014 yaliyofanyika leo katika ukumbi wa Edema uliopo Morogoro mjini. (Picha zote na Veronica Kazimoto – Morogoro).

=========  =======  ======

OFISI YA TAIFA YA TAKWIMU YAWANOA WAKUFUNZI WA UTAFITI WA WATU WENYE UWEZO WA KUFANYA KAZI

(Na Veronica kazimoto – Morogoro)

06 Januari, 2014.

Ukosefu wa Ajira umekuwa ni changamoto kubwa kwa sasa duniani kote ambapo ripoti ya mwaka 2013 ya Shirika la Kazi Duniani (ILO) kuhusu hali ya ajira duniani, inaonesha kuwa takribani  watu milioni 197 sawa na asilimia 5.9 ya nguvu kazi duniani hawana kazi.

Hayo yamesemwa na Naibu Waziri wa Kazi na Ajira Mhe. Dkt. Milton Mahanga   wakati akifungua Mafunzo ya Wakufunzi wa Utafiti wa Watu Wenye Uwezo wa Kufanya Kazi wa mwaka 2014 yaliyofanyika leo katika ukumbi wa Edema uliopo Morogoro mjini.

Dkt. Mahanga amesema kati ya watu 197 ambao hawana kazi vijana ni milioni 73.8 sawa asilimia 12.6 ambayo ni nguvukazi inayopaswa kutumika ipasavyo kwa kuwa kuna mahusiano makubwa kati ya ukuaji wa tija na matumizi ya nguvukazi. Ameongeza kuwa, kutokana na changamoto hiyo ya ajira, ni muhimu kufanya Utafiti wa Watu Wenye Uwezo wa Kufanya kazi ili kuisaidia Serikali kufuatilia mwenendo wa mabadiliko yanayotokea katika soko la ajira.

Mahanga amefafanua kuwa utafiti huu utasaidia pia kuboresha sera na program mbalimbali za kukuza ajira, kupanga na kufuatilia utekelezaji wa mipango ya maendeleo kama vile Malengo ya Milenia, Dira ya Maendeleo ya mwaka 2015 na Malengo ya MKUKUTA na MKUZA. Kwa upande wa Mwakilishi wa Mkurugenzi Mkuu wa Ofisi ya Taifa ya Takwimu Ephraim Kwesigabo amesema lengo kuu la Utafiti wa Watu Wenye Uwezo wa Kufanya Kazi ni kukusanya takwimu zinazohusu hali ya soko la ajira nchini.

Kwesigabo amesisitiza kuwa utafiti huo utawezesha  kupata viashiria vinavyohusu ajira na ukosefu wa ajira kwa makundi mbalimbali yaliyopo katika jamii na hivyo kuisaidia Serikali kuboresha sera ya kukuza ajira nchini. Mafunzo hayo ya wiki mbili yameandaliwa na Ofisi ya Taifa ya Takwimu ambapo jumla ya Wakufunzi 60 kutoka mikoa mbalimbali nchini wanaendelea kupewa mafunzo juu ya Utafiti huo  wa Watu Wenye Uwezo wa Kufanya Kazi utakaoanza rasmi mwezi Februari hadi Disemba mwaka 2014.